Lirik Lagu Minang Pamenan Mato

Lirik Lagu Minang Pamenan Mato oleh Elly Kasim ft Yus Dt. Parpatiah

Bamulo di hari nan dahulu
Tatkalo insan ka tajadi
Tatkalo nyao ka batamu

Dari sahari ka sahari
Dari sabulan ka sabulan
Sambilan bulan sapuluah hari

Lahialah anak ka dunia
Diliek jinih parampuan
Gadang lah hati apak mandeh

Alah dapek pamenan mato
Ubek jariah palarai damam
Pauleh tali nak jan putuih
Kaik-kaik nak jan rangkah

Mako baniaik maso itu
Umua panjang rasaki murah

Nan ketek dinanti gadang
Diasuah jo kasiah sayang
Ditanai bak minyak panuah
Ditatiang bak piriang kaco

Limpapeh rumah nan gadang
Tumpuan kasiah nan jo sayang
Bak bungo nan sadang kambang
Mananti disuntiang urang

Agak sudah jangko lah tibo
Mupakaik niniak jo mamak
Dapek lah jodoh ka junjuangan

(Ciptaan Nazif Basir, Baralek Gadang 1988, Dipopulerkan oleh Elly Kasim dan Yus Dt. Parpatiah dkk)